منذ خمس سنوات .. ذهبت مع أحد أقربائي الكبار لمقابلة أحد فروع عائلة والدتي في جدّة .. فرع لا أعلم عنه أي شيء .. و لا أعرف منه أي إسم ولا رسم .. كانت عزيمة رجال .. و قال لي تعال أعرّفك على بعض أقربائك البعيدين جدّاً .. قلت بسم الله ..

ذهبنا .. دخلنا المجلس .. جلسنا .. عرّفهم على محسوبكم ( -> أنا ) .. هذا إسمه بندر .. و المهم .. حصل هذا الحوار مع إثنين من ( أقربائي الجدد البعيدين الذين لا أعرفهم ) فور جلوسي :

الأول : ما شاء الله يا بندر .. فين تشتغل ؟
أنا : في المكان الفلاني ( أجبته ) ..

الأول : جميل ما شاء الله .. يعني إنت ساكن في جدة ؟
أنا : إيوه يا سيدي ..

الأول : فين ساكن في جدّة ما شاء الله ؟
أنا : في الخالدية يا سيدي ..

الأول : عند صب واي ؟
أنا : إيوه عنده .. تماماً ..

الأول : طيب ممتاز .. يعني حولك في المنطقة مطاعم ..
أنا : إيوه .. و أروح صب واي أحياناً ..

- هنا دخل الثاني فجأة في الحوار -

الثاني ( بحماس شديد و إبتسامة ) : و كمان جنبك بيتزا هت ممكن تاخذ منه :) ..
أنا ( بإشمئزاز ) : أعوذ بالله من الشيطان الرجيم !!!

الثاني ( بإستغراب ) : ليه خير ؟!
أنا : بيتزا هت مطعم أي كلام و معفّن و ما يسوى ريال واحد !

الثاني : ليييه ؟؟؟ إيش به بيتزا هت ؟
أنا : يا عمّي كلام فاضي ! .. لا الطلبات تجي بسرعة ! .. و لو جات ما تجي مزبوطة ! .. و تجي دائماً باردة ! .. و مزيّتة كأني طلبت بيتزا زيت ! .. و الموظفين أي كلام ما عندهم أي إحترام للزبون ! .. و الفاتورة دائماً تجي غلط ! .. و .. و .. و .. و ما قد رحت إلا و خرجت من عندهم بمضاربة !!!

الأول مؤكّداً : صادق بندر .. و الله صادق ..
بقية الحاضرين يهزون رؤوسهم ببطء موافقين : إي والله صادق .. تعبان بيتزا هت .. ( طبعاً أكتشفت أن صوتي كان عالي شوية و كل الموجودين في المجلس سمعوني أسب في بيتزا هت في حماس و إندفاع ) ..

الثاني تغير لونه .. و بدا العبوس على وجهه .. و أنا مو فاهم إيش الهرجة ..


المهم .. تناولنا العشاء و الحمد لله .. بعد العشاء جائني ( الثاني ) و قال لي على إنفراد : أنا مدير بيتزا هت على مستوى جدّة ( و أنا عاد وجهي صار ألوان لكني بقيت على إبتسامتي ) .. خذ هذا كرتي ( طلع فعلاً مدير بيتزا هت ! أبو الورطة ! ) .. و أحب أعطيك وجبات مجّانية لك و لأصحابك في بيتزا هت و يسعدني أنكم توافونا بتقييم لكل شيء في المطعم يساعدنا إننا نتحسّن ( أنا أقول فبالي مستحيل تتحسّنوا ! ) .. المهم أخذت الكرت و بلعت ريقي و ودّعته لأنه إستأذن و خرج من العزيمة .. و بعد كده لا إتصل بي .. ولا أتصلت به .. قلت إبعد عن بيتزا هت و لا تغني له !


طبعاً بيتزا هت لم و لن يتحسّن .. فرع الخالدية أغلق منذ ٤ سنوات .. قريبي ( الثاني ) ترك إدارة بيتزا هت منذ ٣ سنوات .. و تتغيّر الإدارات و بيتزا هت ثابت على تعاسته ..


منذ سنتين فقط .. كنت في أبها .. دعانا أصدقائنا هناك إلى عشاء على بيتزا هت ( عندهم واحد فرع ) .. المهم .. خرجت بمضاربة كنت أنا ( البلطجي ) فيها .. طلبت منهم إحضار مدير الفرع ليأتي و يتذوّق البيتزا التي أتت إلينا بنكهة الفسيخ مع بعضٍ من عفن البحر رغم أنها ( مارجاريتا ! ) ليُفتينا فيها !!! .. جاء المدير .. و رفض أن يذوقها .. قلت له : و الله ما حأدفع ريال فيها .. قال : أُمّال مين حيدفع ؟ .. قلت له : إنت ! أو تذوقها الآن و تحاول تكتشف إيش المشكلة ( باحاول أساعدهم ) .. رفض مرة أخرى أن يتذوقها .. خرجت بدون أن أدفع / ندفع أي ريال ( و الشباب سبقوني عالسيارة بعد أن أخبرتهم أني سأتولّى الأمر ) .. طبعاً أنا هنا أختصرت المضاربة .. لأني أصلاً طلبت من المدير إنه يجيب مديره .. أو مدير مديره .. و ما عندك أحد طبعاً ..


ترى العادة ( في أي مطعم محترم ) أن آكل الوجبة بكل أدب و أنا ساكت و أمشي .. و لو جا الأكل بارد ممكن آكله و أنا ساكت مو مشكلة أمشّي حالي .. لكن مع بيتزا هت الموضوع مختلف .. هذا مطعم فعلاً ما يسوى ريال و ولا مرة ما جاء فيه أي شيء صح .. يستاهل المضاربة و العناد بكل ما تعنيه الكلمة ..


الخلاصة :

أستاذ بيتزا هت .. بإمكانك اللحاق بالنوكيا .. لأن هذا مستواك ..

pizza hut

79 Responses

  1. ياساتر !


  2. افرع البحرين ممتازة !!
    ممكن تكون المشكلة في القائمين على بيتزاهت السعودية ؟


  3. خالد العيسى
    شايف كيف ؟ :)

    ورق مخطط
    أكيد المشكلة في القائمين على بيتزا هت السعودية .. لا شك في ذلك !


  4. و الله إنك صادق

    هنا في كندا ما جربته بس الظاهر إنو مضروب لأنو دايماً (ينش دبان)


  5. اخاف احكي تضربني بندر :? !


  6. فعلاً شي يرفع الظغط !

    كنت طالب منهم قبل فتره وفعلاً تندمت، وغير كذا انصدمت بالفاتوره انهم حاطين شارج على الديلفري ! بـ ١٠ ريال ! ، وهو ما يبعد عني سوا دقيقتين بالسياره و ٦ دقايق مشي !

    الله يخلينا دومنيز بيتزا :D

  7. وئام

    افا ..
    حرام عليك يابندر … سبيت احب بيتزاء عندي
    تصدق من شد ادماني عليها جتني فتره حسبت روحي حامل و ( اتوحم ) عليها ..

    لكن تضل مسأله ذوق ..

  8. Mazen

    بيتزا دومينوز اطعم بكثير من بيتزا هت بغض النظر كانت البيتزا من السعودية او من البحرين او حتى من بندر عباس :)


  9. nOuf.a.s
    يمكن فروع الرياض محترمة ؟ ما أدري .. بس فروع جدّة ما تسوى ريال .. و العاملون فيها لا يشجعون الزبون على العودة مرة أخرى ..

    يزيد الغريبي
    كل مرة نندم يا صاح .. خلاص .. كفاية ..
    أنا بصراحة لا أنوي دخوله أبداً أبداً أبد الآبدين !!!!

    وئام
    في أي مدينة ؟؟؟؟ جدة ؟؟؟؟
    متأكدّة ؟؟؟ بيتزا هت ؟
    دي كلّها زييييييييييييت !


  10. Mazen
    لا .. إلّا بندر عبّاس !
    :)


  11. والله يا أخي بندر بتعجبني مواضيعك كلها …
    خليتي حكره بيتزا هت رغم حبي لها
    لعلمك في مصر بيتزا هت ممتازة ولكن لو جيت الإسكندرية يوم ما سوف أعزمك في مطعم قديم قدم الأزل للبيتزا أصله إيطالي يدعى ” شيجابي ” وساعتها الإدمان حيخليك تطلبها مني بال DHL
    أسعد الله أيامك


  12. تعيش دومينوز :D


  13. أفندينا
    إسكندريّة المحروسة ؟
    ليه لأ ؟
    نورت المدونة يا أفندينا :)

    روان
    أنا قلت كده برضو .. دومينوز أو حتى أي بيتزا ثانية في الدنيا أكيد أحسن من بيتزا هت ..
    :)


  14. بيتزاهت “أفضل “مطعم بالنسبة لي في داخل حدود الرياض فقط , جربته في أكثر من دولة وكان مستواه دون المتوقع !

  15. iNdoOo

    ٣ مرات انعزم في بيتزا هت ،،

    مره تجيني البيتزا عجينه ما استوت

    و مره بايته و بارده (( غداء حتي الاشباع يجيبوا كل شي باااااايت و مسخن ))

    و المره الثالثه ف العيد و جاني تسمم انا و اختي ،،

    :(

    ترا انا لسا ابغا اعيش دنيتي والله رغم اني اموووت في شي اسمه بيتزا بس فعلا بيتزا هت السعوديه دمار

  16. sula

    يب

    معاك حق .. بيتــزا هت سيء جـداً

    وبيتــزا هت أبها دا حكاية تانية ..

    رحتــو مررا فـ حياتي وكان ح يغمى عليا بس ربنا ستـر ..

    ..

    تعيش بيتزا فن تايم xD

  17. iNdoOo

    ع فكره بيتزا هت الرياض مختلف في ادارته عن بقيه مناطق المملكه و هوا اللي جاني فيه التسمم ،، ههههههههههه


  18. تعالى بس أنت أسكندرية ونورنا
    لعلمك أنا شهادتي المتوسطة من مدارس جدة وكنت ساكن ناحية مستشفى الداغستاني وأجمل ذكريات طفولتي بجدة في سوق البلد والحراك ومول الشرق الأوسط وأيامها كان المول ده معجزة من معجزات الزمن بالنسبة لي …. هههههه الكلام ده كان في نصف الثمانينات … والله فكرتني بأحلى أيام يا بندر
    سلامي لك دائماٌ ولأهل المملكة عموماٌ ولتراب جده العزيزه لدي


  19. بندر ما اسمحلك :(

    الا بيتزا هت ممكن نتفاهم على اي شي :)

    انا ما ادري عن فروع جنوب المملكة لكن فروع جدة وكيلها يختلف عن باقي المدن ;)

    راسل الشركة الام وقلهم وكيلكم في جدة جدا سئ :)

  20. مرسال

    أنا أييدك 100%

    فعلاً مطعم سيئ … وما أدري ليش العالم يروحو له !!!
    آخر موقف لي معهم … طلبت طلب خارجي … وقال لي فقط ربع ساعة … راحت نصف ساعة قلت ماشي … بس المشكله أن الببسي اللي مع الطلب طلع حااار !!! … فيه أحد يشرب ببسي حار ؟؟؟
    قال لي آسفين بس ما فيه إلا حار … قلت بكل أدب ممكن تبدله بعلب وبعدد أقل كمان من قيمة العلبة الحارة … فأعتذر وقال بوقاحة العرض يجي معاه علبه كبيره فقط !!!
    عملت عملتك (*%^&$#) وأخذت فلوسي وطلعت الى غير رجعه.
    آسف للإطالة.
    محمد


  21. بالراحة يابندر .. تعوذ من ابليس :)
    انا معاك بيتزا هت لا مكة ولا جدة مستواهم جيد .. احيانا كثيرة يخبصوا ف البيتزا .. وطلبات التوصيل تجي بعد الموعد بكم ساعة (ياما اتورطنا مع الضيوف :| ) ..
    أفتكر مرة رحت فرع بيتزا هت في لبنان .. يااخي مو سيء .. الا سيء ونص .. ومني قادرة آكل ولا لقمة !!
    وكم مرة تطلع السلطة مخمجة والطلب ناقص .. وغير كدا في محلات ارخص واجود منه (دومينوز يوصل أسرع بكثير من بيتزا هت )
    بس بعض الفروع كديكورات جيدة والله :)


  22. ايش قلت في كنتاكي ؟؟؟ وجهان لعملة واحده .. والسبب جنسية العماله الموجوده


  23. أوافقك وأنا مغمض.. والعاملين بعد الفليبينيين خلاص خربت ولا عاد عنك احد..


  24. بندر شكلك مشكلجي وعصبي :) >> امزح

    الصراح انا مره وحده في حياتي طبيت بيتزا هت شفت المنيو حقتهم فيها بقايا بيتزا طلعت وسبتها

    على فكره لا حظ ان الإداره المصريه واحترامي للمصرين كلهم غير مؤهلين لإدارة المطاعم

    تصور انا في برقر كنج وآكل وشويه اسمع من نفس البلد الشقيق يتبادلون الشتائم الوقحه جدا اللي مااقدر انطقها حتى لإحترام المكان

    في السابق كان فيه اداره فلبينيه ممتازه و انا ماعمري شفت مطعم ادارته فلبينيه وغير نظيف

    ودمتم


  25. آخر مره أكلت بيتزا هت ، وبعدها حرّمت آكله ..قبل سنيييين ..
    كنت آكل بامان الله ، واطالع من فتحه البارتيشن الـ salad bar
    الا بنت صغيره ، تاكل من الدريسنق بالملعقه وترجعها ..
    قلت للي بالمطعم ،محد عطاني وجه ..
    من بعدها كرهت بيتزا هت .. وكرهت الثاوزند آيلاند دريسنق …

    مافي زي دومينوز ، توب :)

    شكرا بندر ..


  26. والله طلعت تخوف @_@ !!

    هههههههههههههههههههههههههههه


  27. عجييييييب والله !!!!!!!

    بالرغم من اني ماكنت احب الا “بيتزاهت” بس دي الفتره تغير الوضع وصار “دومينوز” هو التوب عندي
    البيتزا في دومينوز حلوه والعجينه وكل شي مية مية
    وزي ماقلت انتا انو “بيتزاهت” كلوووووو زيت في زيت ،،
    مع اني ماقد ركزت في الشي دا الا لما انتا قلت عليه لاحظت انو كلامك صحييييح D:

    وصح كلامك بالنسبه للموظفين ،، ماعندهم احترام للزبون

    انا قبل كم شهر كنت في فرع التحليه اتغدى مع اصحابي
    وكان عالطاوله “ملاحة” بس اظن انو فيها جبنه مدري والله ماني عارف ايش فيها بالزبط ^^;
    المهم انا مسكتها وقاعد اخربش فيها على مايجي الطلب
    وفجأه اشوف حاجة جوا قاعده تتحرك !!!!

    وربي اللي خلقني طلع انو داخل الملاحة ” ذباااااااااااااابة ”
    انا انصدممممممممممت
    وعلى طووووووول قمت اكلم بعض الموظفين اقولهم ابغا السوبر فايزر
    وكلهم مطنشيني ، وفي الاخير بالقوه حصلت السوبر فايزر
    واعطيتو الملاحة ، وقلت له : ايش دا اللي جوا ؟؟
    طالع فينا الرجال ويقول : انتو اللي سويتو كدا ؟؟
    قلنا : ليش ؟؟ يعني شايفنا بزوره جايين نلعب ولا ايش ؟؟
    المهم كدا الرجال حط الموقف علينا وعالاساس انو نحن اللي حطينا الذبابه داخل الملاحة وراح غيرها لينا

    دومينوز وارفع ايدك D:


  28. لقمتين و نفسك تقفل من الزيت
    كلامك سليم
    ليّا ستة سنين تقريبًا مقلع عن دا المطعم
    دومينوز
    thin crust
    لا تكلمني…


  29. بتزاهات
    بالنسبه للزيت انا معاك
    ولكن بيتزا هت يضل الافضل في نظري ..
    زرت فرعين او ثلاثه في جده ولكن لم يكن هناك اي مشكله
    قد يكون نوع البيتزا يختلف عما تطلبه انت ! :)
    ولكن معظم زياراتي لبتزاهت في المدينه ..
    وبصراحه بتزاهت في مصر ” القاهره” لها مذاق جدا جدا رائع
    ومختلف تماما عن السعوديه !
    بختصار تشعر ان جميع المكونات ” فرش ” !!

    عموما الناس اذواق .. واختلاف الرأي لايفسد للود قضيه :)


  30. ما تنلام ,, لانه اسوأ من السيء
    بحياتي ما رحت و انا متأكدة اني بطلع راضية..

    لازم يأخرونا في الطلبات ما لا يقل عن ساعة..

  31. o T h M a N

    سلملي على “بيتزا كمبني”
    وتدري عروض بيتزا هت ما تنطبق عليكم ياأهل جدة


  32. ترا يقولو أصلاً اسمه “بيت زاهت” وفي رواية “بيت زاهد” وذلك لزهده في خدماته.

    والله أعلم.


  33. حرام عليك كان ساعدت الرجال اعطيتو كم نصيحة

    وقلتلو خلي يسوي زي دومينوز :)

  34. HotbirD

    جربت بيتزا إن ؟؟

    افضل بيتزا بالنسبة لي ..!!


  35. بندر لاتجيبلي سيرت بيتزاهت الله يرحم والديك
    المشكلة عندنا في المكتب كل ما تصير مناسبة ولا حفلة، كل الموظفين أول ما يسمعوا كلمة بيتزا على طول يطلبوا بيتزاهت!!!! أنا و كم واحد بس إلي نقولهم ياجماعة خليكم على دومينوز، بس مفيش أمل خالص!!!!!
    عموما، في جدة بيتزا لينيو و أرفع يدك!!!!

  36. Husam

    بيتزا هــت هو أزبل الزبائل على مستوى المطاعم التي تدّعي أنها إيطالية

    فعلاً يا بندر أن ملاحظاتك في محلها


  37. من جد ياساتر :D
    وكرهي لهذا المطعم مايقل عن كرهك له لنفس الأسباب لكن مره شكيت انه اللحم مو لحم !!
    وربما كان لحم لكن لحم بساس او شيء من هذا القبيل
    مطعم سيء وماراح يتحسن زي ماقلت


  38. دايم العروض حقتهم يجي مكتوب أن هذا العرض غير ساري في جدة أكيد الوكيل غير


  39. بشكل عام لا أحب أكل المطاعم. والمطاعم التي أتعامل معها معدودة على أصابع اليد الواحدة وبالطبع بيتزا هت ليس من ضمنها.

    وعندما جربت بيتزا هت خارج المملكة وجدته ممتازاً وأكثر شيء يعجبني هو خدمة الطلب أونلاين وتحديد وقت رغبتك باستلام الطلبية في منزلك إضافة إلى وصول الطلبية ساخنه جداً وطازجه.


  40. انا ايضا اكره بيتزا هت عندنا
    وجربت البيتزا في الكويت كان اجمل بكثير مما لدينا
    نعم الى الجحيم بيتزا هت :)


  41. انا كمان رميت بيتزا هت في الزباله و هارديز و كنتاكي قبله
    من جد ادارتهم جا سيئه و حتى المدراء عندهم من جنسيه حده
    وكل واحد يغطي عالثاني..
    دومينوز يعتبر جدا مناسب و افضل من بيتزاهت بمليونين مره.

  42. عدنان يتحدي المخاطر

    سبحان الله.قبل كم يوم كنا نتحدث عن مطاعم البيتزا. واتفقنا ان بيتزا هت هو الاسوء بلا منازع.

    طبعا الاصل في مطاعم البيتزا هو دومنيوز بيتزا. اذا كنت تفكر بان تطلب بيتزا وتاكلها في البيت فدومنيوز يضمن لك شيئين..ان البيتزا يتم تحضيرها بعد طلبك وليس شى محضر مسبقاً..والضمان الاخر هو ان تصلك ساخنه. اعتقد انه شى مرضي كخدمه..اما الطعم فكما قلت لك..هو الاصل في البيتزا. وليتل سيزر جيد ايضاً.

    لست مدير في دومنيوز بيتزا..لكن بالنسبه لشخص جميع وجباته من الطاعم منذ سنين..فاصبح لدي تعصب للجوده سواء من ناحيه الخدمه او الاكل نفسه..واحب لاخيك ماتحب لنفسك :)

  43. عدنان يتحدي المخاطر

    شايف اللي حاصل يابندر؟ تعتقد متي يكون “هذا الشى” متوفر عندنا..بدل كل نص ساعه تتصل والموظف يستهبل ويقولك عند الباب!! وغالبا انام والطلب ماوصل.
    http://images.google.com/images?q=Dominos%20Pizza%20Tracker&ie=UTF-8&oe=utf-8&rls=org.mozilla:en-US:official&client=firefox-a&um=1&sa=N&tab=wi


  44. هههههههههه والله إنك صادق
    بالنسبة لي اشتري بيتزا من مطعم عادي ولا اشتري منها

    :)


  45. بندر لو صادف ولقيت نفسك بالرياض
    جرب بيتزا هت !
    راح تلقى أنه يضاهي كثير من المطاعم

    في أمريكا آكل منه أسبوعيا والوضع ممتاز
    لكن الغريب أن الناس هنا يحبون مطاعم البيتزا المحلية في كل مدينة


  46. ههههههههههههههههههههههههه
    انا اقرا الموضوع وقلت الحمدلله في احد قال بيتزا هت سيئ المشكلة اسمة معطية اكبر من حجمة ولما يقولون نتعشاء في بيتزا هت وانا ارفض كانوا يعصبون ، بصراحة ما اقدر اروح مكان البيتزا طعمها مش حلو وفوق هذا دائما نسمع عن الصراصير في البيتزاهت واصبح الكل شاهد على هالموضوع …
    بس كويس انك خليته يلحق نوكيا ياليت لو حطيت معاه (ليتل سيزر) كنت راح اكون شاكرة لك :)
    - بس بصراحة مدير المطعم موقف لا يحسد عليه من جد :)

  47. محمد بستكي

    هذي أول مشاركة لي في مدونتك يا بندر و أرجو أن تتقبلوني صديق لكم!

    مع إنها أول مشاركة راح تكون “سلبية شوي”!
    لإن البيتزا هت عندنا في الكويت عال العال ولا قاصره شي!!

  48. al7lem

    لا تكن كــ قمة الجبل , ترى الناس صغارا ويراها الناس صغيره !
    سبحان الله .. غصب لا تحبوووو البيتزا هت خخخخخخخخ
    بندر قال يعني خلاااص !!! كلنا لازم ما نحب البتيزا من بيتزا هت

    :)

  49. mkharsa

    بالفعل ! انا يعني مثلاً اكلت بيزا هت في مكه، كان صراحه مقرف بالفعل يعني باردة ” عليها زيت ” مو كويسه بتاتاً ما اعجبتني في الاكل بتاتاً وضعوها في الكرتونه خلال ثانيتين من بعد الطلبية يعني كل العملية ” بـعباطه – بسرعه وبدون اتقان ” .

    بس فرق شاسع بين بيتزا هات في مصر ” القاهره ” وبين السعوديه .. انا جربت تاعت مصر كانت ولا اروع الجبنه على الاطراف ساختة جداً توكل اصابعك من وراها ! فيه فروع بالمره مو حلوه .

    .

  50. Mazen

    فݺ ماليزيا ذهبت ال مطعم بيتزا هت ࡸطلبت بيتزا خضار .. فوجئت ببيتزا خضاࡡ بالاناناࡣ!!

    قلݚ فݺ نفسي انݗ لݸ طالݘ سلطݙ فواكݷ كان احسن .. ما ادري ليش الفلسفة البايخݙ عنݟ هذࡗ المطعݵ


  51. آآآآآآآآه يا يوسف لا تفكرني بلنيو

    أنا محرووووم


  52. احس الموضوع صار كبير

    والنهاية بيتزا يا جماعة

    والحقيقة انا أحب البيتزا البيتي بالذات حقت زوجتي أكثر من غيرها

    هذا لايمنع إني أقول أن دومينوز بيتزا مكان إحترافي لصنع البيتزا
    ولاحظوا أني لم أقل لتناول البيتزا لأنهم أصلا لايركزون على صالة الطعام بل على سرعة التوصيل


  53. والله صدقت .. فعلاً الإستهتار وصل إلى فروع العاصمة , أمثلة “ليست على سبيل الحصر” :
    - الكاشير جايب معاه أغراض من البيت (شرشف،مرايا)؟؟؟-فرع طريق الملك عبدالله .
    - السلاطة بار مافيه ذرة أو خس أمريكي .
    -المناديل المستخدمة عادي تشوفها كجزء من سمات الديكور .
    -صحة الجرسونات تسلتزم علاج نفسي طويل المدى “يعني ايه هو اللي مش عاجب حضرتك ، هوا في حاقه نائصه في الأور-در”

    النتيجة- إلى الامام دمينوزبيتزا


  54. هع ، كان عزمتنا مجاني ، البلاش كثر منوووو


  55. أخي بندر

    إنت ما ذقت بيتزاهت في مكة
    لو ذقتها تحمد ربنا على اللي في جدة
    في مكة نسميها تميس بالجبنة

    بس في جدة أنا ما ألاحظ عليه شي
    يمكن تغير مستواه
    لكن أنا أفضل دومينوز بيتزا

    لكن جربت بيتزاهت في ألمانيا كان روعة
    وطلبت عنده باستا جلست أتوحم عليها زي الحوامل سنة كاملة
    حتى أكلتها مرة تانية في العام اللي بعده

    شكرا لك

  56. X

    إيش هذي العنصرية
    الان انا متعشي بيتزا هت والله حمااااس
    وطعم ولا اروع
    على فكرة الفرع في جدة كمان
    يعني العلة ن الفرع مب من المطعم


  57. عندنا في الرياض ما يفرق كثير عن جده نفس التعاسة في كل شيء… انا ايضاً نادراً ما اخرج منه بدون ان اقوم بمشهد “فرجه” للمدير.

    برأيي ان تدريب موضفينهم اي كلام، والادارة ماشية بالبركة.


  58. اشوا انه اللي في ماليزيا كويس :D


  59. بندر ..

    اذا جيت الطايف أذوقك بيتزا أمي ..

    بلا بيتزاهت بلا كلام فاضي .. الحمدلله على النعمة


  60. أشكركم على التفاعل الصارخ ( مع أو ضد ) .. من الواضح أنه مطعم مشهور جدّاً ( بالسمعة الجيدة أو السيئة ) .. و من الواضح أن البيتزا تعتبر عموماً من الأكلات المحبوبة على مستوى العالم ..

    بالعافية .. و الله يسعدكم :)


  61. السلام عليكم :)

    المطاعم بشكل عاام مشبعه بالدهون ..وخصوصا ماك ..

    مافي احلى من اكل البيت وبس :)


  62. بيتزا من البيت والا بلاش :P


  63. الله يعينك ..
    بس أكل المطاعم دون استثناء .. ولو صار لنا موقف مع مطعم نعممه ع العايلة
    وكل فروعه بالمملكة ما ناكل منه
    واحنا داخل انفسنا ندري انهم كلهم زي مع بعض

  64. حنان

    معك حق بيتزاء هت ردئ
    كله زيوت والسلطة مش طازه
    وجلساته بدائيه

  65. هيام

    أنا اويد كلامك ميه بالميه صراحه كأنه معموله بزيت منتهي تاريخ الصلاحيه ،تحياتي


  66. والله يا بند شكلك حق مضاربات ..
    ياخي لاتشتري وخلاص ..
    أنحلت المشكله ..
    بس بصراحه ما ألومك لانه مطعم مش أد كده ..
    تقبل مروري أخوك جواد ..

  67. Mazen Islam

    صراحة بتزا هت مضروب جدا جدا جدا … بس أحيانا أشتهيه

  68. Mazen Islam

    مطعم فاشل


  69. والله صادق , حتى اللي بالمدينة , مافي إلا فرع واحد كويس والباقي متل صحابكم اللي بجده , الله يعيننا ويصبرنا عالمطاعم .
    تحياتي بندر .
    أدهم :) .


  70. و الله تخوف يا بندر !!
    آخ يا قوي .. لما أسوي مطعم .. أنبه العمال منك !
    خخخ


  71. انا معاك الخدمة سيئة واحياناً الأكل سيء

    بس ايش يسوو أصحاب الطبقة المتوسطة مثلنا !؟

    مالهم الا وجبة حتى الاشباع منه !

    على الاقل افضل من ليتل سيزر


  72. Domino’s Pizza ولا تناقش احد فيه

    قال ايش قال بيتزا هـت , ياحبيبي لوو راح اموت من الجوع ما اكلت من بيتزا هـت


  73. يا ماما دومينووز وبس : D
    ولتسقط بيتزا هت


  74. بيتزا هت ..
    الصراحة هو واحد من المطاعم اللي بتفرق جودتها بالمنطقة ..
    يعني بـ جدة انا الصراحة ما لقيت مشاكل كبيرة بالاكل ..
    بس بـ جودة الخدمة والتعامل والنظافة !!
    في فرق كبيييير !!
    المطعم طلعت كتير مرات منه .. بسبب سوء النظافة .. او سوء الخدمة ..
    اما بالنسبة للـ أكل ..
    يعني كان كتير مرات يكون مش مستوي منيح ..
    اما بالنسبة للـ زيت .. بلاحظها بالبيتزا اللي بالجبنة بكثرة ..
    بالنسبة للـ نظافة ..
    شوف الصحون المكسرة والتشققات السودا اللي فيها ..
    او روح حط صحن سباغتي .. وشوف كيف الـ صوصز مكبوبة على بعض ..
    غير الـ تواليت و أنتم بكرامة ..
    والطلبات ..
    بتشوف فيها انواع التأخيرات ..
    وأنواع الرخبطات ..
    اما بـ فروع البيتزا هت بـ عمان بالأردن .. الصراحة ما واجهت مشاكل ..
    بس انا بصراحة .. لو كان الاختيار الي ..
    ما بختار البيتزا هت لـ أروح اوكل فيه ..
    لانه اغلب المرات اللي بوكل فيه ..
    بكون اختيار الشباب اصحابي ..
    او اني بكون معزوم ..
    بندر ..
    انا معاك بهاي النقطة ..
    باي ..


  75. وعلى فكرة
    خدمتهم بـ أميريكا احسن بكتييير !!
    يعني الاكل والنظافة ما بتلاقي حكي ..
    بس يمكن مرات بتصير رخبطة بالطلب ..
    وبعوضوك فيها وبعتذروا 60 مرة منك !!
    مرة عشان حطوا زيتون اسود على قطعة زيادة ..
    أعطونا كوبونات ..
    وبدلوا الطلب ..
    وما حاسبنا !!

  76. cut

    هههههههههههههه
    والله صادق بكل شي
    بتزا هت اسوء شي


  77. أهااااا ..بتزا زفت اسمها
    ليش مانطلق حمله ضدهم ؟والله يكون احسن
    بس تدري ..فيه احلى من دومينوز ..جربوا بيتزا كومباني ok
    وراح تدعوا لي :)
    >>>انقلبت جلسة توصيات :)

  78. محمد

    من فضلك المشكلة كبيرة فى السعودية نتيجة نظام السعودة ونظام الكفالة الاستعباد لذلك معظم العمالة فى المملكة غير مؤهلة والمرتبات تعبانة مع نقص وقلة العمالة مما يعرض العمالة لضغط شديد وهذة مشكلة السعودية فى كل القطاعات

  79. hussam

    مالو داعي تكره الناس في مطعم ايا كان
    وترى المطعم زحمه دايما مع اني ما احبو
    وافضل دومينوز مليون مررره

و إيه رأيك في الموضوع ؟

Comments will be sent to the moderation queue.